Nagapabutyag sang paglaum ang kampo ni Senador Ronald “Bato” dela Rosa nga hatagan na sang aksyon sang Korte Suprema ang ila pinakabag-o nga ginpasaka nga manipestasyon nga nagapangabay nga repasuhon ang nauna nga desisyon sang korte.
Ginpahayag ni Atty. Israelito Torreon, legal counsel sang senador, nga nagalaum sila nga pagatagaan sang konsiderasyon sang Korte Suprema ang ila pangabay nga mag-isyu sang Temporary Restraining Order (TRO).
Nahibaluan nga ginbalibaran sang mataas nga korte ang una nga manipestasyon sang kampo ni Dela Rosa nga nagapangayo sang TRO agud mapunggan ang implementasyon sang arrest warrant nga ginahambal nga naghalin sa International Criminal Court (ICC), bangud sa kakulang sang legal nga basihan.
Apang, bangud sa bag-o nga mga sitwasyon, lakip na ang ginapahayag nga P50 milyones nga padya sang senador, nagbalik liwat ang iya kampo sa Korte Suprema paagi sa isa pa ka manipestasyon.
Paagi sini, ginapangabay nila ang korte nga baliskaron ang nauna nga desisyon kag magpagwa sang TRO agud mapunggan ang posible nga pagdala kay Dela Rosa sa International Tribunal.
Ginalauman man sang iya legal team nga maaksyunan sang Korte Suprema indi lamang ang pinakabag-o nga manipestasyon kundi pati ang kaupod sini nga petisyon nga nagakuwestiyon sa legalidad sang pagdala kay anay Presidente Rodrigo Duterte sa The Hague, Netherlands.
