Padayon ang preparasyon sang South Cotabato Rehabilitation and Detention Center sa posible nga epekto sang Super El Niño, ilabi na sa pagseguro sang husto nga bentilasyon kag bastante nga suplay sang tubig para sa mga Persons Deprived of Liberty (PDL).
Sa interview sang Bombo Radyo Koronadal kay Ret. Police Lt. Col. Barney Condes, Jail Warden sang pasilidad, ginpahayag sini nga may yara sang nagakaigo nga bentilasyon, suplay sang tubig kag mga lugar nga mahimo mapahuwayan sang mga PDL agod mahagan-hagan ang epekto sang tuman nga kainit.
Suno kay Condes, magadugang man ang institusyon sang water tank agud masiguro nga may bastante nga reserba sang tubig, ilabi na kun magnubo ang suplay sini bangud sa posible nga epekto sang El Niño.
Dugang pa sang Jail Warden nga may yara man sang covered area sa sulod sang pasilidad nga mahimo tambayan sang mga PDL, ilabi na sa mga tion nga mataas ang heat index, agod malikawan ang sobra nga pagkapaslawan bangud sang kainit.
Samtang, ginpahayag man ni Condes nga padayon ang pagpatigayon sang nagkalain-lain nga programa para sa mga PDL, lakip ang mga aktibidad, livelihood programs kag mga kahigayunan nga mapakita nila ang ila mga talento.
