Nagpanawagan sa Local Government Unit (LGU) sang Koronadal City ang isa ka nagabisita sa public cemetery nga maaksyunan ang problema sa mga pantyon nga natabunan na sang duta bangud sa nagluntad nga baha.
Sa interview sang Bombo Radyo Koronadal kay Engr. Willie Batobalani, isa ka cemetery goer, iya ginpahayag nga dugay na nga problema sang ila pamilya ang pagpangita sa pantyon sang ila mga himata nga nagtaliwan na bangud natabunan na ini sang duta.
Suno kay Batobalani, nagakinahanglan pa sila sang P200 agud mapalimpyo kag mahibaluan liwat ang nahamtangan sang pantyon sang ila mga pinalangga.
Ginpahayag niya nga natabunan ang mga pantyon bangud sa nagluntad nga baha, rason nga nabudlayan na sila sa pagpangita kag pagbisita sa lulubngan sang ila mga himata.
Bangud sini, ginapanawagan ni Batobalani ang LGU Koronadal nga hatagan sang nagakaigo nga aksyon ang nasambit nga problema, agud mangin mahapos kag indi na mabudlayan ang mga pumuluyo sa pagpangita sa pantyon sang ila mga pinalangga nga nagtaliwan na.
