Nagpabutyag ang MASIPAG Mindanao sa gobyerno nga palig-unon ang lokal nga produksyon sang bugas kag dugangan ang suporta sa mga mangunguma agud masiguro ang suplay sang pagkaon sa tunga sang ginapaabot nga epekto sang Super El Niño.
Sa interview sang Bombo Radyo Koronadal, ginpahayag ni Kenneth Cagula, advocacy officer sang organisasyon, nga kinahanglan unahon ang lokal nga produksyon kaysa pagsalig sa imported nga bugas.
Suno kay Cagula, kinahanglan ang anum ka milyon ka ektarya nga talamnan sang palay agud makab-ot ang rice self-sufficiency, apang yara lamang sa 4.8 milyon ka ektarya ang kasamtangan nga rice-growing area sang pungsod.
Ginpahayag man niya nga may mga mangunguma sa Luzon nga nagabaligya sang palay sa ₱12 tubtob ₱13 kada kilo, nga posible indi makabawi sa gasto sa produksyon.
Base sa datos sang Department of Agriculture nga iya ginpresentar, naglab-ot sa ₱8.57 bilyon ang agricultural damage and losses, nga nakaapekto sa 288,000 ka mangunguma sa 14 ka rehiyon.
Ginapaabot nga mahimo magpadayon ang epekto sang El Niño tubtob sa una nga tunga sang 2027.
Gani, ginapanawagan sang MASIPAG Mindanao ang dugang nga suporta sa mga mangunguma, mas masaligan nga suplay sang tubig, kag pag-edukar sa pagpili sang mga pananom nga maka-adopt sa nagabag-o nga kondisyon sang panahon agud mapabakod ang lokal nga produksyon kag seguridad sa pagkaon.
