Padayon nga ginabulong sa ospital ang 14 ka indibidwal matapos makakaon sang liso sang kasla sa Koronadal City.
Sa kabug-usan, 15 ka indibidwal, lakip ang mga kabataan, ang nakakaon sang nasambit nga liso matapos makita sang isa ka 8-anyos nga bata sa YouTube nga ginakaon man ini sang iban.
Sa interview sang Bombo Radyo Koronadal kay Pamela Lasib, iloy sang isa sa mga kabataan nga nakakaon sang liso, ginpahayag niya nga nakuha sang 8-anyos nga bata ang ideya nga kaunon ini matapos makita sa iya ginalantaw nga video sa YouTube.
Bangud sini, nagkuha ang bata sang madamo nga liso sang kasla kag ginpanagtag ini sa iya mga kaupod nga kabataan nga nagahampang.
Suno kay Lasib, isa sa mga nakabaton sang liso amo ang iya 7-anyos nga bata.
Wala na matumod sang mga kabataan nga liso sang kasla ang ila ginkaon bangud napanitan na ini antes ginpanagtag.
Ginpahayag man ni Lasib nga pati ang isa ka 44-anyos nga indibidwal ang nakakaon sini bangud wala man niya natalupangdan nga liso sang kasla ang ginhatag sa iya.
Samtang, nagreklamo sang pagsakit sang tiyan, pagsululuka, pagkalingin sang ulo kag burning sensation sa tutunlan ang pila sa mga nakakaon sang liso.
Suno kay Lasib, wala pa nagapakita sang sintomas ang iya bata kag ang iban pa nga nakakaon sang nasambit nga liso.
Bangud sang insidente, nagpanawagan si Lasib sa mga ginikanan nga hugot nga bantayan kag imonitor ang ila mga kabataan, ilabi na sa mga pagkaon nga ila ginakaon kag sa mga video nga ila ginatan-aw sa internet, agud malikawan ang kaangay nga hitabo.
