Posible nga mabatyagan sang mga negosyo kag konsumidor ang epekto sang paghinay sang ekonomiya, samtang amat-amat nga naganubo ang kadamuon kag kabaskog sang pagbakal sang mga tawo sang mga produkto kag serbisyo.
Sa interview sang Bombo Radyo Koronadal, ginpahayag ni Atty. RJ Sustiguer, presidente sang South Cotabato Chamber of Commerce and Industry, nga dapat kabalak-an ang padayon nga pagluya sang piso kontra dolyar bangud mahimo ini magdugang sa gasto sang mga negosyo kag konsumidor.
Dugang pa niya, ginakabalak-an man ang posibilidad nga magsarado ang mga micro, small, and medium enterprises (MSMEs) bangud sa epekto sang inflation, nagasaka nga gasto sa operasyon kag iban pa nga kabudlayan sa pagpadalagan sang negosyo.
Apang, suno kay Atty. Sustiguer, may advantage ang South Cotabato bangud indi amo kataas kag kabaskog ang epekto sang pagsaka sang presyo sang mga produkto sa probinsya.
Sa pihak sini, ginpabug-atan niya ang kinahanglanon nga magpatuman gilayon ang gobyerno sang epektibo nga mga tikang agud maatubang ang problema sa bayluhanay sang piso kag dolyar kag mapahanas ang dugang nga kabudlayan sa ekonomiya.
Gin-insister man ni Atty. Sustiguer ang importansya sang pagbinuligay sang gobyerno kag pribado nga sektor agud mabuligan ang mga negosyo nga magpadayon sa operasyon kag mapahagan-hagan ang epekto sang nagasaka nga presyo sa pang-adlaw-adlaw nga pangabuhi sang mga pumuluyo.
