Wala sang direkta nga epekto sa balor sang kwarta sa Abu Dhabi ang pagbag-o sang palitan sang piso kontra dolyar, apang padayon nga mabatyagan sang mga pamilya sang overseas Filipino workers (OFWs) sa Pilipinas ang epekto sini, ilabi na sa nagataas nga presyo sang mga baraklon.
Ini ang ginpaathag ni Nicole Bedtao, Bombo International News Correspondent to Abu Dhabi, sa interview sang Bombo Radyo Koronadal.
Suno kay Bedtao, nagapabilin ang balor sang kwarta sa lugar nga iya ginapuy-an, apang ang pagbag-o sang palitan sang piso kontra dolyar may epekto sa kwarta nga ginapadala sang mga OFW sa ila pamilya sa Pilipinas.
Dugang pa niya, bisan mataas ang balor sang remittances nga ila ginapadala, nagapabilin nga apektado ang ila mga pamilya bangud sa padayon nga pagsaka sang presyo sang mga kinahanglanon sa adlaw-adlaw nga pagkabuhi.
Samtang, ginpahayag ni Bedtao nga wala gina-obserbar sa Abu Dhabi kag sa madamo nga Arab countries ang Todos los Santos kag Pista Minatay pareho sa Pilipinas.
Bangud sini, pangamuyo na lamang ang iya ginahimo agud madumduman ang iya mga pinalangga sa kabuhi nga nagpanaw na sa Pilipinas, bisan malayo siya sa iya pamilya.
Bisan yara sa iban nga pungsod, nagapabilin nga importante para sa iya ang pagdumdom kag pagpangamuyo para sa mga minahal nga wala na sa ila tunga.
