Mga ka-bombo! bal-an nyo bala nga may yara sang Isa ka pony ang nangin talalupangdon nga kalahok sa sports day sang Zhenlong Primary School sa Anhui, China, matapos sini malabawan ang mga estudyante sa ginpatigayon nga karera sang Oktubre 22.
Suno kay Zhang Yilong, isa ka manunudlo sa eskwelahan, ang mga estudyante nga nagpartisipar sa karera mga naga-eskwela sa Primary 1 kag Primary 2. Apang, wala ginpaathag sa report kon paano ginpatigayon ang karera ukon kon pila ang gintingob nga distansya sini.
Ang pony isa sa duha ka Shetland pony nga ginapuy-an sa petting zoo sang eskwelahan. Ang duha amo ang iloy kag anak, nga gin-ngalanan nga “Qiyue” kag “520.”
Ang ngalan nga Qiyue nagakahulugan sang Hulyo, samtang ang 520 ginhalinan sa petsa sang pagkatawo sang bata nga pony, Mayo 20.
Indi lamang sa mga aktibidad sang eskwelahan makita ang duha ka pony, bangud sa natalana nga mga oras, ginaguwa man sila agud makapalapit kag makainteraksyon sa mga kabataan.
Suno kay Zhang, malulo ang kinaiya sang duha ka pony kag indi ini mag-atake sa mga tawo kon wala ginahagit ukon ginapahasol.
Gani, luwas sa nangin makalingaw nga karera, nagahatag man ang presensya sang mga pony sang kahigayunan sa mga estudyante nga makakilala kag makapalapit sa mga sapat.
