Nagapapbilin nga naka-hold ang pagpatuman sang 90-day preventive suspension nga ginmando sang Sandiganbayan kanday Senators Jinggoy Estrada kag Rodante Marcoleta samtang ginahulat ang resolusyon sang korte sa ila mga mosyon para sa reconsideration.
Suno kay Senate President Sherwin Gatchalian, nabaton na sang Senado ang mga mando sang anti-graft court, apang indi anay ipatuman ang suspensiyon tubtob wala pa sang resolusyon sa mga mosyon nga ginpasaka sang duha ka senador.
Gindugang niya nga wala man anay sang pagpatuman sang suspensiyon samtang wala pa sang pinal nga desisyon ang korte sa ila mga hangyo.
Samtang, ginpahayag ni Gatchalian nga indi makabaton sang sweldo ang duha ka senador bangud sa ila mga pagliban sa Senado.
Matandaan nga ginmando sang Fifth Division sang Sandiganbayan ang 90-day preventive suspension kay Estrada, nga nagaatubang sang kasong plunder may kaangtanan sa alegasyon sang pagbaton sang kickback halin sa kuwestiyonable nga mga proyekto sa flood control.
Samtang, pareho nga suspensiyon ang ginmando sang Third Division kay Marcoleta may kaangtanan sa alegasyon nga nagbaton ini sang ₱75 milyon nga kampanya nga donasyon sang nagaserbisyo pa siya bilang kongresista sang party-list.
Ang masunod nga tikang sa pagpatuman sang suspensiyon magadepende sa resolusyon sang Sandiganbayan sa mga mosyon sang duha ka senador.
