Nag-insistir ang mga mambabatas nga dapat masiguro ang mas hugot nga transparency kag accountability sa paggamit sang pondo sang gobyerno, kasunod sang desisyon sang Korte Suprema nga nagtakda sang mga limitasyon sa unprogrammed appropriations (UA).
Suno kay Mamamayang Liberal Party-list Representative Leila de Lima, bisan handum nila nga bug-os nga ipawalay-bisa ang UA, isa ka importante nga tikang ang pagtakda sang Korte Suprema sang klaro nga mga limitasyon agud mapunggan ang posible nga pag-abuso sa pondo sang publiko.
Ginpabug-atan man niya nga indi dapat gamiton nga panagang sa pananagutan ang doctrine of operative fact sang mga mapamatud-an nga nag-akto nga may malain nga intensyon.
Samtang, ginpahayag ni Akbayan Party-list Representative Chel Diokno nga dapat klaro nga ginatukoy kag ginabutang sa badyet ang mga prayoridad nga proyekto sang gobyerno, sa baylo nga ipasulod ini sa UA nga mahimo mangin alagyan sang pag-abuso kag korupsiyon.
Ginpanawagan man niya sa Senado kag House of Representatives nga siguruhon ang pagsunod sang 2027 national budget sa desisyon sang Korte Suprema, halin sa nagapadayon nga deliberasyon tubtob sa bicameral conference committee.
Dugang pa sang duha ka mambabatas, kinahanglan nga madula ang mga porma sang pork barrel kag masiguro nga ang pondo sang pungsod nagakadto sa mga programa kag proyekto nga nagaserbisyo sa kaayuhan sang pumuluyo.
