Ginkwestyon ni Senador Panfilo Lacson ang 2024 kag 2025 national budgets, nga iya gintawag nga pinakamanubo ang kalidad sa mga budget nga gin-aprobahan sang Kongreso, kasunod sang desisyon sang Korte Suprema nga nagdeklarar nga unconstitutional ang pila ka probisyon sini.
Sa iya pahayag sang Miyerkules, ginpahayag ni Lacson nga bangud tapos na ang duha ka fiscal year, posible nga indi na mapagwa ang mga pondo nga wala pa nagamit, samtang ang mga nagamit na mahimo nga indi na ma-invalidate.
Lakip sa ginpamatud-an sang Korte Suprema nga problema sa 2024 General Appropriations Act (GAA) amo ang pagdugang sang ₱449.5 bilyon sa unprogrammed appropriations. Sa 2025 GAA, ginbasura man sang korte ang pagdugang nga ₱17.9 bilyon sa Special Road Fund.
Suno kay Lacson, nag-abot sa husto nga tion ang desisyon sang korte samtang gin-usisa sang Senado ang 2027 General Appropriations Bill nga ginpadala sang House of Representatives.
Samtang, ginpasalig ni Senate President Pro Tempore Vicente “Tito” Sotto III nga pagapadayonon sang Senado ang pagpatuman sang transparent nga proseso sa pag-usisa sang 2027 national budget, kaangay sang ila ginhimo sa 2026 budget, lakip ang pag-livestream sang mga pagtalakay.
Gindugang niya nga importante nga mahibaluan sang publiko kon diin makadto ang pondo sang gobyerno agud masiguro ang kaathag kag accountability sa paggamit sang kwarta sang katawhan.
