Nakahanda ang pamahalaan na maglaan ng mahigit P7.8 bilyon para sa pagtugon sa epekto ng El Niño sa bansa, kabilang ang mga relief operation at iba pang kinakailangang hakbang, ayon sa Office of Civil Defense (OCD).
Ayon kay OCD spokesperson at Disaster Preparedness Service Director Vic Tomas, may P7.864 bilyon sa National Disaster Risk Reduction and Management Fund na maaaring gamitin para sa mga hakbang laban sa epekto ng tagtuyot.
Batay sa datos ng NDRRMC, nasa 106 na lugar sa limang rehiyon na ang nagdeklara ng state of calamity, kabilang ang 66 na lugar sa Cagayan Valley. May nakahanda ring P6.685 bilyon sa ilalim ng Disaster Rehabilitation and Reconstruction Assistance program para sa mga nangangailangan, lalo na sa mga lugar na nasa ilalim ng state of calamity.
Samantala, iniulat ng Department of Agriculture na umabot na sa P6.87 bilyon ang pinsala at pagkalugi sa sektor ng agrikultura dahil sa El Niño, na nakaapekto sa 223,214 na magsasaka hanggang Setyembre 26, 2026.
