Padayon nga ginatutukan sang mga otoridad ang duha ka aspeto sa imbestigasyon sa shooting sa Banga National High School—kon paano naka-access sa armas ang 16-anyos nga Grade 9 student nga ginatudlo nga suspek kag kon may kaangtanan ang iya online activity sa insidente.
Sa interview sang Bombo Radyo Koronadal ginpahayag ni Banga Mayor Albert “Boyet” Palencia, nga base sa inisyal nga impormasyon nga iya nabaton halin sa eskwelahan kag kapulisan, ang suspek ginasiling nga nakaagom sang pagkadismaya bangud sa mababa nga grado. May impormasyon man nga ginakonsiderar sang pamilya ang pagpakonsulta sa mental health professional.
Apang ginpahanumdom nga ini nga mga detalye bahin sa personal nga kahimtangan sang suspek kinahanglan pa mapamatud-an kag indi dapat dayon itudlo bilang amo lang ang kabangdanan sang pagpangluthang.
Ginausisa man sang mga otoridad ang koneksyon sang estudyante sa isa ka online “true crime” community, lakip ang mga post nga ginalantaw nga may kaangtanan sa insidente. Padayon pa ang verification kon may aktuwal nga impluwensya ang online content sa ginhimo sang suspek.
Importante man nga bahin sang imbestigasyon ang ginhalinan sang armas. Suno kay Palencia, ang pusil ginasiling nga nakuha sang suspek sa ginatagoan sang armas sa ila panimalay.
Samtang, ginpatuman na sang lokal nga panguluhan ang suspension sang klase sa bilog nga banwa sang Banga kag ginatan-aw ang dugang nga security measures sa mga eskwelahan.
Nagpahayag man ang Department of Education nga magahatag ini sang psychological first aid kag psychosocial support sa mga naapektuhan sang insidente. Nagpanawagan man ang ahensya sa publiko nga indi magpalapta sang wala pa napamatud-an nga impormasyon.
Padayon ang imbestigasyon sang mga otoridad agud matukod ang kompleto nga timeline sang insidente, lakip ang paagi sang pagkuha sang armas kag ang posible nga mga factor nga may kaangtanan sa pagpangluthang.
