Nagpahayag sang paghangyo ang isa ka commuter nga dapat balanse ang pagpasaka sang pamasahe para sa kaayuhan sang mga pasahero kag traysikol driver.
Sa interview sang Bombo Radyo Koronadal kay Manang Gigi, isa ka commuter, iya ginpahayag nga may mga traysikol driver na nga nagapanukot sang sobra ukon labaw sa nakatalana nga pamasahe, bisan wala pa ginapatuman ang opisyal nga fare increase.
Suno pa sa iya, kun mapatuman na ang fare increase, posible nga mangin dugang ini nga kabudlayan sa iya kag sa iban pa nga mga pasahero.
Apang ginpaathag ni Gigi nga pabor man siya sa pagpasaka sang pamasahe, ilabi na bangud sa nagataas nga presyo sang gatong.
Kinahanglan lamang, suno sa iya, nga balanse ang pagpatuman sini agud indi lang ang mga driver kundi pati man ang mga pasahero ang mahatagan sang konsiderasyon.
Ginpahayag man niya nga dapat intindihon sang mga driver nga naga-antos man ang mga ordinaryo nga commuter bangud sa padayon nga pagsaka sang presyo sang mga baraklon kag iban pa nga pangadlaw-adlaw nga kinahanglanon.
Bangud sini, nagpanawagan si Gigi sa gobyerno nga maghimo sang gilayon kag epektibo nga mga tikang batok sa nagapadayon nga pagsaka sang presyo sang gatong kag mga kinahanglanon sa pungsod.
