Nagdangat na sa 32 ka indibidwal ang kumpirmado nga patay bangud sa pinagsamo nga epekto sang Habagat kag nagligad nga mga bagyo nga Luis, Maymay kag Neneng, suno sa pinakabag-o nga report sang Office of Civil Defense ukon OCD.
Pinakadamo nga casualty ang napagkit sa Benguet nga may 15 ka patay bangud sa mabaskog nga landslide.
May mga namatay man sa La Union, Rizal, Batangas, Quezon, Mindoro, Negros Occidental kag Caloocan bangud sa pagkalumos, electrocution, rockslide kag pagkahulog sang mga kahoy.
Samtang, 19 ka tawo ang napilasan kag tatlo pa ang ginapangita sa Quezon City, Manila kag Batangas.
Ginabulubanta nga 8 milyon ka tawo ukon 2.3 milyon ka pamilya ang naapektuhan sang malain nga panahon sa nagkalain-lain nga bahin sang pungsod.
Masobra 25,800 ka indibidwal ang yara pa sa mga evacuation center.
Nagdangat naman sa P6.11 bilyon ang halit sa imprastraktura kag P2.32 bilyon ang pilde sa sektor sang agrikultura.
Masobra 3,000 ka panimalay ang nadamage, lakip ang 349 nga totally destroyed, samtang 117 ka local government units ang nagdeklara sang State of Calamity.
Suno sa gobyerno, padayon ang paghatag sang ayuda sa mga apektado, kag yara na sa P1.65 bilyon ang kabug-usan nga kantidad sang relief assistance nga naipanghatag.
