Sa pag-atubang sang school threats, indi lang ang buluthuan kag otoridad ang may responsibilidad kundi pati ang media kag pamilya. Sa interview sang Bombo Radyo Koronadal ginpahayag ni Nikko Lynn Ladera, RPsy, ang presidente sang South Cotabato Psychological Association, nga para sa media, kinahanglan nga ma-verify anay ang impormasyon antes ini ipalapta ukon i-broadcast agud malikawan ang pagdaku sang kahadlok kag paglapta sang indi pa kumpirmado nga impormasyon.
Dugang ni Ladera, nga importante man nga mahibaluan kag ma-tsekyar ang ginapatuman nga security measures sang institusyon kag mga otoridad. Samtang, ginpabug-atan ni Ladera nga daku ang papel sang mga ginikanan sa pag-atipan sang emotional kag psychological well-being sang ila mga kabataan. Indi kinahanglan nga magumpisa sa pagpanga-akig; mas epektibo ang kalmado kag bukas nga pag-istoryahanay agud mahibaluan kon ano ang ila ginapost, ginabatyag, kag mga kabalaka sa buluthuan ukon online.
Suno sa iya, ang pag-regulate sang paggamit sang social media dapat updan sang padayon nga guidance kag regular nga komunikasyon sa pamilya. Paagi sa responsable nga pag-share sang impormasyon, aktibo nga pagmonitor, kag mas bukas nga suporta sa kabataan, mas mapunggan ang paglapta sang threats kag mas madasig nga mahatagan sang bulig ang mga kabataan nga posible nagakinahanglan sang intervention.
