Ginpasalig ni Koronadal City Mayor Erlinda P. Araquil ang publiko nga indi magbag-o ang tindog sang syudad kontra sa mining sa South Cotabato, bisan pa nga nalakip ang Sagittarius Mines, Inc. (SMI) sa mga naghatag sang kontribusyon para sa pagpatindog sang Manuel C. Callejo City of Koronadal Infirmary Hospital.
Suno kay Mayor Araquil, kabahin sang Corporate Social Responsibility (CSR) sang SMI ang paghatag sang pondo kag wala ini nagakahulugan nga makaimpluwensya ang kumpanya sa tindog sang syudad parte sa mga aktibidad sang mining.
Gindugang pa sang alkalde nga padayon ang iya pagpamatok sa bisan ano nga sahi sang mining sa probinsya bangod ang Koronadal nagaserbe nga catch basin, gani posible nga maapektuhan sang pagbaha ang syudad kon magpadayon ang mining sa Tampakan.
Madumduman nga ginbuksan sang lokal nga gobyerno sang Koronadal kag sang provincial government sang South Cotabato ang groundbreaking ceremony para sa nasambit nga infirmary hospital sa Barangay Rotonda sang Biyernes, Oktubre 16.
Nagpain ang provincial government sang ₱50 milyones para sa una nga hugna sang proyekto, nga ginabahin sa ₱45 milyones para sa konstruksyon kag ₱5 milyones para sa medical equipment kag supplies.
