Nakaeksperyensya subong sang “unprecedented rainfall” ukon talagsaon kag mabaskog nga pag-ulan ang sidlangan nga bahin sang Japan nga nagresulta sa malapnagon nga pagbaha kag landslide, nga nagutas sang anum ka indibdiwal kag lima ka pilason.
Suno sa mga awtoridad, lakip sa mga napatay ang isa ka babayi nga yara sa sulod sang iya salakyan nga nalumos sa baha sa dalan.
Duha naman ka indibidwal ang natabunan sang nag-collapse nga dalan kag sang ulihi napatay.
Bangud sini, ginpaalintonan nga mag-evacuate ang sobra 100,000 ka residente matapos ang mga na-record nga landslide kag pagkadula sang suplay sang kuryente bangud sa mabaskog nga pag-ulan.
Sobra 20,000 ka panimalay ang nadulaan sang kuryente, samtang mga 7,000 ka biyahero ang ginreport nga na-stranded sa Narita Airport sa Tokyo.
Sa Chiba, malapit sa Tokyo, nakapagkit sang sobra 100 millimeters sang ulan kada oras halin sang hapon sang Huwebes.
Ini tatlo ka pilo sang average rainfall sa Agosto kag amo ang pinakataas nga rainfall nga napagkit sang pungsod.
Kaangot sini, nag-isyu ang lokal nga mga awtoridad sang Level Five Emergency Warning, ang pinakamataas nga alerto, apang ginpaidalom ini sa Level Four sang Biyernes sang aga.
