Nagapabilin nga nagapamatok ang lokal nga gobyerno sang Tampakan sa pagmina sang Tampakan Copper-Gold Project, bisan makita na ang mga preparasyon sa lugar nga ginalauman nga mag-umpisa ang operasyon sa 2028.
Sa interview sang Bombo Radyo Koronadal kay Tampakan Mayor Leonard Escobillo, iya ginpahayag nga wala ginasuportahan sang LGU ang proyekto sa masunod nga duha tubtob tatlo ka tuig kag wala man nagakoordinar sa iya administrasyon ang mining company humalin sang iya pagpungko bilang alkalde.
Ginpaklaro ni Escobillo nga ang road widening kag compaction work nga ginahimo sa lugar indi nagakahulugan nga naghatag na ang LGU sang go signal para sa operasyon.
Kabahin lamang ini, suno sa iya, sang mga obligasyon sang kumpanya sa idalum sang Financial and Technical Assistance Agreement (FTAA), lakip ang pagtukod sang kaugalingon nga access roads.
Ginaduso man sang lokal nga panguluhan ang Forest Land Use Plan kag Comprehensive Land Use Plan nga nagahatag sang prayoridad sa pagpreserbar sang kagulangan kag mga forest reserves sa pila ka lugar.
Padayon man ang pag-monitor sang LGU sa mga illegal mining activities sa banwa kada 15 ka adlaw.
