Nakigkoordinar na ang kapulisan sa City Social Welfare and Development Office (CSWDO) agud ipaidalom ang menor de edad nga biktima sa psychological evaluation kag debriefing, agud masiguro ang kaayuhan sang iya mental health.
Ini ang nangin pahayag ni PLtCol Harold Cornel, Chief of Police sang Koronadal City Police Station, sa interview sang Bombo Radyo Koronadal.
Suno kay PLtCol Cornel, iya ginpahayag nga determinado ang pamilya sang biktima nga magpasang-at sang kaso batok sa retirado nga pulis nga suspek sa shooting incident sa Barangay San Isidro, Koronadal City.
Apisar negatibo ang paraffin test sang suspek, ginpahayag ni Cornel nga indi ini nagakahulugan nga wala sang kahilabtanan ang suspek sa insidente.
Isa lamang ang paraffin test sa mga teknikal nga eksaminasyon kag mahimo maglain ang resulta depende sa nagkalain-lain nga kondisyon.
Samtang, ginpaidalum man sa gunpowder residue examination ang isa ka lisensyado nga armas luthang nga narekober sa suspek, samtang ginahulat pa ang resulta sini.
Wala pa matumod sang kapulisan ang eksakto nga armas nga gingamit sa pagpangluthang bangud wala sang narekober nga shell casings ukon slugs sa crime scene.
Sa karon, nagapadayon ang imbestigasyon sang kapulisan, lakip ang pagkuha kag pag-usisa sang mga CCTV footage nga mahimo makabulig sa imbestigasyon.
