Nagakinhanglan sang sobra P1 bilyon nga pondo ang pagpatuman sang Master Drainage Plan sa Koronadal City.
Sa interview sang Bombo Radyo Koronadal kay Koronadal City Mayor Erlinda Araquil, iya ginpahayag nga kinahanglan ini agud masolbar ang padayon nga problema sa pagbaha kag guba nga mga agianan sang tubig.
Apektado sa sini ang mga residente sa pila ka lugar, lakip ang Purok Kauganayan sa Barangay GPS.
Suno sa alkalde, nagapadayon ang pagbaha sa lugar nga nagahatag sang kabudlayan sa mga residente, ilabi na kun mabaskog ang ulan.
Ginkilala ni Araquil ang Master Drainage Plan bilang isa sa mga solusyon sa nagabalik-balik nga problema sa drainage sang syudad.
Nakigkoordinar naman ang alkalde sa South Cotabato 2nd District kag Senior Deputy Speaker Ferdinand Ferdinandez agod iprioritize ang Master Drainage Plan sa nasambit nga purok.
Ginpahayag nga kinahanglan ang sapat nga pondo agud mapatuman sang husto ang proyekto kag masolbar ang problema sa drainage.
Ginpabutyag ni Mayor Araquil sa publiko nga amat-amat masolbar ang mga nagabalik-balik nga problema ukon isyu sa syudad, kag padayon ang pagpaninguha sang lokal nga gobyerno para sa kaayuhan sang mga residente.
