Madinalag-on nga na-rescue sang National Bureau of Investigation-Central Mindanao Regional Office (NBI-CEMRO) ang siyam ka ginaalegar nga biktima sang human trafficking, lakip ang ginaalegar nga isa ka menor de edad, sa ginpatigayon nga entrapment operation sa isa ka bar sa Barangay Zone I, Koronadal City.
Sa interview sang B ombo Radyo Koronadal kay Investigation Agent III Elias Leaño Jr. – National Bureau of Investigation Region 12, iya ginpahayag nga naarestar man sa nasambit nga operasyon ang duha ka floor manager nga ginaalegar nga nagaserbi bilang mga bugaw kag may kaangtanan sa ginapatihan nga human trafficking activities sa amo nga establisyimento.
Suno kay Leaño, nagalab-ot sa 17 ukon 18 tubtob 27 anyos ang edad sang mga na-rescue nga biktima, lakip ang ginaalegar nga isa ka menor de edad.
Gilayon nga gindala sa kustodiya sang NBI ang mga na-rescue agud mahatagan sang nagakaigo nga proteksyon kag assistance, samtang padayon ang imbestigasyon sa kaso sang duha ka nadakpan.
Sa karon, padayon pa nga gina-verify sang mga otoridad ang matuod-tuod nga edad sang mga na-rescue kag kun may menor-edad sa ila samtang, gina-imbestigaran ang posibilidad nga may iban pa nga indibidwal nga nalakip sa ginapatihan nga human trafficking operation.
