Nagapadayon ang assessment kag monitoring sang City Engineering Office sang Koronadal matapos ang magnitude 7 nga linog nga nagtay-og sa bahin sang Mindanao, partikular sa Sarangani, Davao Occidental sang Agosto 5 nga nabatyagan man sa syudad sang Koronadal.
Sa interview sang Bombo Radyo Koronadal, ginpahayag ni City Engineer Ruel C. Tianchon nga sa ila inisyal nga inspeksyon, wala sila nakakita sang seryoso nga structural damage sa City Hall kag sa iban nga mga pampubliko nga establisemento sa syudad.
Suno kay Tianchon, bisan nabatyagan ang kusog sang linog sa Koronadal, wala ini nakaapekto sa structural integrity sang mga edipisyo.
Ginpahayag niya nga padayon gihapon ang ila pagmonitor agud masiguro ang kahimtangan sang mga imprastruktura.
Ginpaathag niya nga ang pila ka makita nga litik sa pader sang City Hall yara lamang sa finishing ukon aesthetic nga parte sang edipisyo kag wala nagapakita sang problema sa pundasyon, poste, beam, kag slabs.
Samtang, ginrekomendar sang mga otoridad nga indi anay gamiton ang mga bahin sang pribado nga establisemento nga may nakit-an nga litik tubtob matapos ang inspeksyon kag kinahanglanon nga pagkay-o.
Ginpanawagan ni Tianchon ang publiko nga magpabilin nga alerto kag sundon ang safety protocols sa tion sang linog, lakip ang husto nga paglikaw pakadto sa luwas nga lugar kag paghulat sang clearance antes magsulod liwat sa mga edipisyo.
