Ginarekomendar sang Koronadal City Administrator ang pagdugang sang suggestion boxes sa nagkalain-lain nga opisina sang City Hall agud mas mapahapos ang pagbaton sang mga suhestyon, reklamo, kag iban pa nga concerns sang mga pumuluyo bahin sa serbisyo sang lokal nga panguluhan.
Sa interview sang Bombo Radyo Koronadal, ginpahayag ni City Administrator Vicente “Vic” de Jesus nga kabahin ini sang padayon nga tikang sang administrasyon ni Mayor Erlanda Araquil sa pagpalapad sang partisipasyon sang publiko kag pagpasiguro nga mabatian kag maatubang ang ila mga reklamo.
Suno kay de Jesus, padayon man nga ginakonsiderar sang City Administrator’s Office ang mga reklamo nga nagaagi sa 8888 Citizens’ Complaint Center, lakip na ang mga direkta nga ginapasaka sang mga residente.
Ginpabutyag man sini nga ang tagsa ka reklamo ukon report ginarepaso anay sang maayo kag ginatipunan sang igo nga ebidensiya antes magpatigayon sang administrative ukon legal nga aksyon batok sa mga empleyado nga mapamatud-an nga nakalapas sa mga patakaran.
Nanindugan si de Jesus nga ang pagpalig-on sang feedback mechanism isa ka importante nga tikang agud mapauswag ang kalidad sang serbisyo publiko kag mapabakod ang transparency, accountability, kag pagsalig sang publiko sa Koronadal City Hall.
