Nagsaka sang 33 porsyento ang kaso sang rabies sa bug-os nga probinsya sang South Cotabato, matapos makapagkit sang apat ka kaso subong nga tuig kumpara sa tatlo ka kaso sang nagligad nga tuig.
Sa interview sang Bombo Radyo Koronadal, ginpahayag ni Eldon Hans Serame, Health Education and Promotion Officer II sang Integrated Provincial Health Office (IPHO) South Cotabato, nga isa ka kaso ang napagkit sa Koronadal City, duha sa Surallah, kag isa sa Tantangan, South Cotabato.
Suno kay Serame, ginahimo ang pag-isolate sa mga pasyente nga may rabies bangud ginakabig ini nga Level 3 infectious disease, nga mahimo makalaton pinaagi sa body fluids ukon laway sang infected nga pasyente.
Ginpabutyag niya nga ang amo nga tikang ginapatuman agud malikawan ang paglapta sang virus sa iban pa nga mga pasyente kag mga healthcare workers.
Sa pihak sini, ginpasiguro ni Serame nga 100 porsyento nga mapunggan ang rabies kun makabaton gilayon sang husto nga bulig medikal.
Gani, ginhingyo niya ang publiko nga magpalapit gilayon sa pinakamalapit nga health center ukon balay-bululngan para magpa-inject sang anti-rabies vaccine pagkatapos makagat ukon makamrasan sang ido ukon kuring ukon bisan ano nga sapat ng infected sag rabies agud mapunggan ang virus antes ini makalab-ot sa utok.
