Nagapadayon ang preparasyon sang syudad sang Koronadal para sa palaabuton nga T’nalak Festival 2026, lakip na ang pagkumpleto sang ila espesyal nga bahay kubo nga mangin isa sa mga tampok nga bahin sang selebrasyon.
Suno kay City Tourism and Cultural Affairs Office Head Elric Batilaran, ginadesenyo ang bahay kubo ni Architect Marvin Arigreya nga magrepresentar sa identidad, kultura, kag pag-uswag sang Koronadal.
Ginpahayag ni Batilaran nga ang disenyo sini nagalakip sang pito tubtob walo ka simbolo nga nagapakita sang mga kinaiya kag importante nga istorya sang syudad.
Lakip sa mga sentro nga elemento ang pabilog nga disenyo nga nagarepresentar sa papel sang Koronadal bilang isa sa mga benepisyaryo sang European-Philippine Circular Green Economy Program.
Ang konsepto sang disenyo nagasandig sa responsable nga paggamit sang resources paagi sa pag-recycle kag paglikaw nga mangin basura ang mga materyales.
Ginpahayag man niya nga ginapakita sini ang pagkahiusa sang nagkalain-lain nga kultura sa syudad, lakip ang mga Blaan, Maguindanaon, kag Christian settlers.
