Napatay ang tatlo ka tawo, lakip ang isa ka 19-anyos nga babayi, bangud sang suffocation ukon kakulang sang hangin sa tunga sang madamo nga tawo nga nagselebrar sang kadalag-an sang Mexico kontra Ecuador sa FIFA World Cup sa Mexico City.
Ginkumpirmar sang mga otoridad nga lakip man sa mga napatay ang isa ka 48-anyos nga babayi kag isa ka 44-anyos nga lalaki.
Natabo ang insidente matapos magtipon ang masobra sa isa ka milyon ka katawhan sa palibot sang Angel of Independence monument agud sa pagsaulog sang 2-0 nga kadalag-an sang Mexico.
Bisan pa sang ginhatagan sila sang first aid kag cardiopulmonary resuscitation ukon CPR, ginkumpirmar sang mga doktor nga napatay ang tatlo bangud sang suffocation.
Nagpaabot sang iya pinakamabaskog nga pakig-unong si Mexico City Mayor Clara Brugada sa mga pamilya sang mga biktima kag nagsaad sang bulig sa ila.
Nagpanawagan man siya sa publiko nga magsaulog nga may responsibilidad kag pagrespeto sa isigkatawo.
Nagtuga sang malawig nga selebrasyon ang 2-0 nga kadalag-an sang Mexico batok Ecuador, nga nagpasulod sa koponan sa Round of 16 sang FIFA World Cup—ang ila una nga knockout-stage victory sa torneo halin pa sang 1986.
