Nagsugod na sang Biyernes ang impeachment trial batok kay Paraguay President Santiago Peña sa Senado, kasunod sang kontrobersiya nga nagalibot sa presensya sang Ueno Bank kag sa ginapahayag nga kaangtanan sini sa pangulo.
Ginreport nga nag-abot sa tatlo ka milyon ang mga depositor nga naapektuhan matapos nga ginpaidalom sang Central Bank ang nasambit nga bangko sa kontrol sini kag gin-freeze ang mga account, nga nagresulta sa pagkabalaka sang madamo nga kliyente.
Gin-akusahan si Peña sang conflict of interest bangud anay siya may shares sa kompanya nga nagakontrol sa nasambit nga bangko. Apang, ginpanginwala sang pangulo ang mga alegasyon nga ginapatuhoy sa iya kag ginapamatud-an pa sa nagapadayon nga proseso.
Samtang, nagprotesta ang linibo ka pumuluyo kag nagpanawagan nga maghatag sang klaro nga sabat ang pangulo sa krisis nga nakaapekto sa madamo nga depositor. Nagapabilin nga sentro sang ila pagpangayo ang accountability kag ang paghatag sang kasiguruhan sa mga tawo nga naapektuhan sang pag-freeze sang ila mga account.
Sa pihak sini, nangayo si Peña sang dugang nga 72 oras agud maandam ang iya depensa matapos niya mabaton ang halos 300 ka panid sang mga dokumento nga nagalakip sang mga akusasyon batok sa iya.
Suno sa pangulo, indi makatarunganon nga kinahanglan niya magsabat sa sulod sang wala pa 12 ka oras, bangud madamo sang mga dokumento nga kinahanglan usisaon kag sabton antes siya makahatag sang kompleto nga depensa.
Apang, ginbalibaran sang Senado ang iya pangabay para sa dugang nga tion.
Sa pihak sini, nagpromisa si Peña nga ipahayag niya sa publiko ang iya depensa kaupod ang iya mga abogado samtang nagapadayon ang impeachment proceedings batok sa iya.
Nagapabilin nga ginabantayan sang publiko ang resulta sang trial, nga mahimo maghatag sang daku nga epekto sa politikal nga kahimtangan sang Paraguay kag sa pagsalig sang mga pumuluyo sa ila gobyerno.
