Gindangat sa balay-bululngan si Heart Evangelista matapos makabatyag sang tuman nga kakapoy, suno sa iya longtime assistant nga si Resty Rosel.
Sa social media post, ginpakigbahin ni Rosel ang mga laragway sang aktres nga naga-confine sa balay-bululngan, nga makita sa hospital bed nga may naka-angot nga medical equipment.
Upod man sa mga laragway ang iya iloy nga si Cecilia Ongpauco kag utod nga si Camille.
Suno kay Rosel, bangud sa sobra nga kasako ni Heart, nag-abot ini sa punto nga indi na makasarang antes siya nagpa-confine sa ospital.
Ginpangabay man niya ang aktres nga unahon anay ang iya ikaayong lawas, kag ginpahayag ang iya suporta samtang ginadepensahan si Heart batok sa online criticism.
Sa separado nga post, ginpakigbahin ni Rosel nga nagaayo na ang kahimtangan sang aktres.
Wala naman siya naghatag sang dugang nga detalye bahin sa medical condition ni Heart.
