Ginpangunahan ni Pangulong Ferdinand Marcos Jr. ang inagurasyon sang rehabilitasyon sang Antong Dam and Irrigation System sa bahin sang Barangay Manili, Lutayan Sultan Kudarat.
Personal man ni Pangulong Marcos nga gin-inspeksyon ang spillway, intake structure kag pila ka mga parte sang dam kalakip na ang pila sa mga LGU officials kag mga engineers sang NIA agud nga makita ang kinahanglanon sa rehabilitasyon.
Ang rehabilitasyon sang nasambit nga irrigation system ang nagbalor sang P1 Billion.
Ginabanta naman nga 355 ka mga mangunguma nga mga miyembro sang Upper-Center-Lower and Baluno (UCLB) Irrigators Association, Inc.ang makabenepisyo sa 1,563.09 ektarya nga proyekto nga makabulig sa ila nga pagpagpanguma kag patubig sa ila nga mga palayan kag makabulig sa produksyon sang mga pananom sang mga ini labi na sa mga mangunguma sa barangay sang Antong, Sampong, kag Manili sa banwa sang Lutayan.
Luwas pa diri, makabulig man ang nasambit nga proyekto sa tion sang pag-ulan pinaagi sa pag kontrol sang baha.
Kalakip man sa mga nagtambong sa nasambit nga inagurasyon si Sultan Kudarat Governor Datu Pax Ali Mangudadatu kag Lutayan Mayor Yasin S. Mangudadatu, lakip man ang mga opisyal sang National Irrigation Administration o NIA.
