Nagluksa ang Thailand matapos pumanaw si Princess Bajrakitiyabha, ang panganay na anak ni King Vajiralongkorn, matapos ang mahigit tatlong taong pananatili sa coma dulot ng isang malubhang kondisyon sa puso.
Kinumpirma ng Thai royal household ang pagpanaw ng 47-anyos na prinsesa, na unang isinugod sa ospital noong Disyembre 2022 matapos mawalan ng malay habang nag-eehersisyo kasama ang kanyang aso.
Batay sa naging pagsusuri ng mga doktor, nagkaroon si Princess Bajrakitiyabha ng mycoplasma infection na nakaapekto sa kanyang puso at kalaunan ay nagdulot ng malubhang komplikasyon sa kanyang kalusugan. Mula noon ay nanatili siyang nasa kritikal na kondisyon at hindi na muling nagkamalay.
Kilala si Princess Bajrakitiyabha hindi lamang bilang miyembro ng Thai royal family kundi bilang isang mahusay na abogado at lingkod-bayan. Nagtapos siya ng mataas na pag-aaral sa batas at nakakuha ng dalawang postgraduate degrees mula sa Cornell University sa Estados Unidos.
Bago bumalik sa Thailand, nagsilbi rin siya sa Thai mission sa United Nations sa New York. Pagkatapos nito ay nagtrabaho siya sa Office of the Attorney General sa Bangkok, kung saan naging bahagi siya ng iba’t ibang legal at pampublikong serbisyo.
Ang kanyang pagpanaw ay nagdulot ng pagluluksa sa buong Thailand, lalo na’t matagal siyang itinuring na isa sa mga pinakakilalang miyembro ng maharlikang pamilya dahil sa kanyang aktibong papel sa batas, diplomasya, at mga gawaing pampubliko.
