Gin kumpirmar sang actor nga si Jake Cuenca nga official nga in a relationship na sila sang aktres nga si Rabiya Mateo.
Ginpahayag ni Cuenca kun ano ka maayo si Mateo kag kun ano sila kasadya sa ila relasyon.
Ginpakigbahin man ni Cuenca nga nauna ini sa pagmove pinaagi sa pagmessage sa aktres sa social media.
Suno pa sa aktor nga inspired siya sa dedikasyon sang anay beauty queen samtang nagasulod ini sa bag-o nga chapter sang iya kabuhi—ang pag-eskwela sa medisina.
Ginpahayag pa ni Cuenca nga sang yara sila sa Hong Kong, didto man nabaton ni Mateo ang kumpirmasyon nga nabaton siya sa isa ka unibersidad para sa medicine para sa madason nga academic year.
Sa Hong Kong man nangin pormal ang ila relasyon, suno sa ginpahayag ni Cuenca.
Subong nga opisyal na sila sang aktres, ginpabutyag ni Cuenca nga nagsaad siya kay Mateo nga mangin matutom kag may respeto sa iya sa tanan nga tion—isa ka butang nga ginpasiguro man sang anay beauty queen sa iya.
Sang ginpamangkot siya kun makita niya ang iya kaugalingon nga pakaslan si Mateo, wala nagduha-duha ang aktor sa pagsabat nga oo, apang ginpabilin niya nga indi anay pagpaguwaon ang iban pa nga detalye.
