Ginpatawag sang European Union kag pila ka mga pungsod sa Europa ang mga kinatawan sang Russia matapos nagbanta ang Moscow sang posible nga pag-atake sa Kyiv kag nagpanawagan sa mga dumuluong, lakip na ang mga diplomat, nga maghalin sa kabisera sang Ukraine.
Lakip sa mga nagpatawag sang Russian envoys amo ang Germany, Norway, Netherlands, Poland, kag Sweden, sunod sa pahayag sang Russia nga target nila ang mga military facility kag “decision-making centers” sa Kyiv.
Suno sa EU diplomatic service, ginpatawag nila ang Russian chargé d’affaires agud ipahayag ang ila mabaskog nga pagsupak sa ila kag ginpabutyag nga magapabilin ang EU delegation sa Kyiv bisan pa sa tensyon.
Samtang, sa Norway, ginpatawag si Russian Ambassador Nikolai Korchunov agud maghatag sang sabat bahin sa ginatawag nga klaro nga mga hulga batok sa mga foreigner personnel sa Ukraine.
Nagpangabay man ang Poland sang gilayon nga pagpauntat sang ila gintawag nga “illegal nga agresyon” sang Russia.
Samtang, ginpanginwala sang Russian embassy sa Germany ang mga akusasyon kag nagpahayag nga “surgical strikes” lang ang ila ginahimo batok sa mga target nga militar.
Suno sa Moscow, ang plano nga operasyon amo ang sabat sa ginatawag nila nga “terrorist attacks” sang Kyiv, lakip ang insidente sa Luhansk nga nagpatay sang 21 ka tawo kun sa diin matigdas nga ginpanginwala sang Ukraine, nga nagsiling nga ang target amo ang isa ka Russian drone unit.
