Ginpasang-atan sang kaso sang United States Department of Justice sa Miami si anay President Raúl Castro sang Cuba, lakip ang lima pa ka iban sang “conspiracy” angot sa pagpatay sang mga US nationals, apat ka kaso sang murder, kag duha ka kaso sang destruction of aircraft.
Gin-akusaran si Castro kag ang Cuban military nga amo ang responsable sa pagpatibusok sang duha ka civilian planes sang 1996 nga ginapanag-iyahan sang Cuban-American group nga Brothers to the Rescue.
Ini nga insidente nagresulta sa kamatayon sang apat ka tawo, lakip ang tatlo ka Amerikano, samtang ginahimo nila ang humanitarian mission sa Florida Straits.
Nagserbi ang anay presidente, bilang anay mataas nga opisyal sang armed forces sang Cuba kag gin-alegar nga siya ang naghatag sang mando agud patobusukon ang mga eroplano.
Lakip sa iban pa nga ginakabig nga akusado amo ang mga fighter pilot nga nagpatuman sang operasyon.
Ginkondenar sang kasamtangan nga Presidente sang Cuba nga si Miguel Díaz-Canel kag sang Cuban Foreign Ministry ang tikang sang US, kag ginatawag nila ini nga “political maneuver.”
Suno sa gobyerno sang Cuba, ilegal ang kaso nga ini kag ginpabutyag nila nga self-defense ang pagpatibusok sang mga eroplano, bangud ginakabig nila ang grupo nga Brothers to the Rescue bilang “terorista.”
Ginakabig man nila nga ang kaso gina-usar sang administrasyon ni US President Donald Trump bilang rason angot sa mas mabaskog nga pressure batok sa ila pungsod.
