Nagtakop na ang kampanya nanday Filipina tennis star nga si Alex Eala kag American partner sini nga si Hailey Baptiste sa doubles tournament sang Italian Open matapos sila malutos kanday Taylor Townsend kag Kateřina Siniaková, 6-2, 6-1, sang Mayo 12 sa Rome.
Sa pagsugod sang hampang, nakakuha dayon sang abanse sanday Townsend kag Siniaková antes nila nakontrol ang ritmo sang hampang.
Sa first set, nakalagas pa sanday Eala kag Baptiste sa pila ka puntos, apang napadayon ang momentum sa Grand Slam doubles champions matapos sila nakapagkit sang asod-asod nga pagdaog sa games tubtob matapos ang set sa 6-2.
Sa ikaduha nga set, nagdominar naman ang ila kontra kag nakakuha sang 4-0 nga abanse.
Nakakuha sang isa ka game sanday Eala kag Baptiste para sa 4-1, apang wala na nila napunggan ang padayon nga agresibo nga serving kag net play nina Townsend kag Siniaková nga nagtakop sa 6-1.
Apisar napirde, ginalauman nga magapadayon si Eala sa iya clay-court preparations sa madason nga mga torneo lakip na ang WTA125 Parma Ladies Open kag Internationaux de Strasbourg bilang preparasyon para sa French Open sa katapusan sang Mayo.
