Padayon ang ginapatigayon nga assessment kag monitoring sang ahensya angot sa posible nga pagsulod sang El Niño phenomenon sa pungod sa madason nga mga semana.
Ini ang nangin pahayag ni Rodrigo Sosmeña – Regional Director, Office of Civil Defense – Region 12, Regional Disaster Risk Reduction and Management Council, sa interview sang Bombo Radyo Koronadal.
Suno kay Sosmeña, wala pa matumod kun ano ang mga sektor nga tuman maapektuhan sang El Niño bangud nagabag-o ang ila monitoring sang kada adlaw sa tunga sang nagapadayon nga pagsaka sang lebel sang tempertura sa rehiyon.
Ginpahayag ni Sosmeña nga padayon man ang preparedness measures sang ahensya angot sa posible nga mga insidente sa tion sang kalamidad.
Dugang pa ni Sosmeña nga padayon man ang paghatag sang mga impormasyon sang ahensya angot sa halit nga tuga sang tuman ka init nga temperatura sa mga vulnerable sectors ilabi na sa ikaayong lawas sang publiko.
Bangud sini, nagapanawagan man si Sosmeña sa publiko nga magtutok sa mga datos kag impormasyon halin sa opisyal nga announcement kag statement sang ila ahensya kag likawan ang magtinir sa mga mainit nga lugar agud malikawan ang health related risks nga tuga sang mainit nga panahon.
