Duha ka separado nga sunog sa kalasangan ang nagluntad sa Iwate Prefecture, Japan sang Miyerkules, kag padayon nga nagdako tubtob naglab-ot sa ginabulubanta 1,176 ka ektarya sang Biyernes sang aga (local time).
Bangud sini, masobra 1,000 ka residente ang ginpabakwit agud masiguro ang ila kaluwasan.
Ang una nga sunog ginreport sang alas-1:50 sang hapon sa Kozuchi district sa banwa sang Otsuchi.
Dasig ini nga naglapta kag nakaapekto indi lang sa kalasangan kundi lakip sa pila ka mga edipisyo sa lugar.
Pagkaligad sang pila ka oras, isa naman ka sunog ang nagluntad sa mabukid nga bahin sang Kirikiri district, nga yara sa mga 10 kilometro ang kalayuon halin sa una nga lugar nga nasunog.
Bangud sa nagapadayon nga peligro, ginmanduan sang lokal nga pamunuan ang mga residente halin sa 566 ka panimalay, ilabi na ang yara malapit sa ikaduha nga sunog nga magbakwit dayon.
Apisar pa sa kalapadon sang sunog, wala pa sang may narecord nga napatay ukon napilasan sa insidente.
Una na nga nagpagwa sang paandam ang weather observatory angot sa mamala nga hangin kag kusog nga pagpanghuyop sini, nga ginapatihan nga nagdugang sa kadasig sang paglapta sang kalayo.
Samtang sini, isa ka 61-anyos nga residente nga nagbakwit upod sa iya pamilya ang nagkumpirmar nga duha ka magkalain nga sunog ang nagluntad.
