Nagpatigayon sang inisyal nga dayalogo ang Pilipinas kag China bahin sa posible nga oil kag gas exploration sa West Philippine Sea samtang ginpadayon ang bilateral talks agud mahagan-hagan ang tensyon sa rehiyon.
Ginhiwat ang Foreign Ministry Consultations kag Bilateral Consultation Mechanism (BCM) sa Quanzhou, China, nga ginpangunahan nila Foreign Affairs Usec. Leo Herrera-Lim kag Vice Foreign Minister Sun Weidong.
Gintalakay sang duha ka pungsod ang posibilidad sang kooperasyon sa enerhiya, lakip ang renewable energy, agrikultura kag kalakalan, samtang ginpabug-atan ang importansya sang stable nga suplay sang enerhiya kag fertilizer.
Sa tunga sang diskusyon, ginpanindugan sang Pilipinas ang iya posisyon sa West Philippine Sea, ginbangon ang mga isyu sa seguridad sang manugpangisda kag personnel, kag ginpabutyag ang importansya sang diplomasya kag pagsunod sa international law, labi na ang United Nations Convention on the Law of the Sea (UNCLOS) kag 2016 arbitral ruling.
Ginalauman nga magabukas ini sang dalan para sa mas mataas nga lebel sang miting sang duha ka pungsod sa masunod nga mga bulan.
