Magpatigayon sang espesyal nga meeting sa madason nga semana ang economic team sang Marcos administration agud talakayon ang suspensyon sang excise tax sa petrolyo.
Suno sa Department of Budget and Management (DBM), nga nagaserbi bilang chairman sang inter-agency nga Development Budget Coordination Committee (DBCC) sa diin aksyunan sang lupon ang mga isyu may kaangtanan sa full fiscal implications sang posible nga suspensyon sang excise tax sa gatong, kag maid-id nga tun-an sang economic team ang angay nga polisiya.
Ginpasalig ni Budget Undersecretary Goddes Hope Libiran nga ginabantayan nila ang pagbalanse sang paghatag sang dayon nga bulig sa mga pumuluyo kag ang pagpreserba sang medium-term fiscal sustainability kag macroeconomic stability.
Madumduman nga sang Miyerkules, ginpirmahan ni President Ferdinand Marcos Jr. ang Republic Act 12316 bilang layi, nga nagahatag sang kahigayunan sa Presidente nga suspendiron ukon buhinan ang excise tax sa petrolyo base sa rekomendasyon sang DBCC, sa pakig-upod sa kalihim sang Department of Energy.
