Patuloy na nakikipag-ugnayan ang Department of Agriculture (DA) sa iba’t ibang bansa upang masiguro ang sapat na suplay ng abono o fertilizer sa Pilipinas, sa gitna ng krisis sa Middle East na nakaapekto sa pandaigdigang merkado.
Ayon kay Francisco Tiu Laurel Jr., umabot na sa doble ang presyo ng abono—mula $400 ay naging $800 kada tonelada.
Dahil dito, nakikipag-usap na ang pamahalaan sa mga bansang tulad ng India, Russia, at Belarus upang makahanap ng alternatibong suplay para sa mga magsasakang Pilipino.
Sa kabila ng sitwasyon, kinumpirma ni Tiu Laurel na walang balak ang China na itigil ang pag-export ng abono sa Pilipinas. Ito ay matapos ang kanyang pakikipagpulong kay Jing Quan upang talakayin ang kooperasyon sa agrikultura.
Pinabulaanan din ng kalihim ang mga ulat na magpapatupad ang China ng export freeze upang unahin ang sarili nitong pangangailangan.
Samantala, tiniyak naman ni Ferdinand “Bongbong” Marcos Jr. na nananatiling sapat ang suplay ng mga pangunahing bilihin at fertilizers sa bansa.
