Magapasubpoena ang House Committee on Justice sang income tax returns (ITR) ni Vice President Sara Duterte kag iya asawa nga si Manases “Mans” Carpio, lakip na ang VAT returns sang ila mga negosyo halin 2023 tubtob 2024, suno kay Rep. Terry Ridon.
Lakip sa subpoena ang ila SALNs kag mga bank transactions.
Suno kay Ridon, may P88 million nga net worth si VP Sara sa iya 2024 SALN, apang ang kabug-usan nga salary niya halin 2007-2024 nagalab-ot lang sang P30 million-P40 million.
Ginsiling ni Ridon nga kinahanglan ipaathag ni VP Sara ang ginbantayan nga diperensya, nga posible nga halin sa “other lawful income” sa iya law practice kag negosyo.
Nagpangayo man si Rep. Chel Diokno nga mag-issue ang komite sang subpoena angot sa mga dokumento nga magahatag klaro sa negosyo ni VP Sara kag Atty. Carpio, lakip na ang mga sertipikasyon halin sa Anti-Money Laundering Council (AMLC) bahin sa mga transaksiyon nga konektado sa ila mga account kag kay anay Pangulong Duterte.
Suno sa Justice Committee, posible nila nga ipa-subpoena ang mga bank records halin 2007 agud imbestigahan ang mga alegasyon sang indi mapathag nga manggad kag korapsyon.
