Nagpaguwa na sag pahayag si Anne Curtis bahin sa kontrobersya matapos nga maulamid ang iya ngalan ni Quezon City Rep. Bong Suntay sa isa ka sekswal nga “analogy” sa House hearing.
Ginpabutyag ni Curtis nga ginpili niya anay nga maghipos bangud kaupod ang iya pamilya sa Middle East, apang sa karon nga nakabalik na siya, kinahanglan na niya magpaguwa sang pahayag nga ginakabig niya nga indi para sa drama ukon pagbalos, kundi kay sala nga magpabilin nga hipos.
Ginpahayag niya nga “bulgar kag sexualized” ang pahayag, kag aminado siya nga nasakitan, nabalaka, kag naakig siya.
Wala niya ginbaton ang pagpangayo sang pasaylo ni Suntay, bisan pa gin-acknowledge niya ang paghingyo sang pasaylo sang asawa sini.
Ginpabutyag ni Curtis nga ang insidente nagapakita sang problema sang sexism sa sosyudad kag nagpanawagan siya sa ethics committee kag iban pa nga awtoridad nga imbestigahan ini.
Sa pihak sini, nagakonsulta na siya sa iya mga abogado para sa posible nga legal nga tikang, samtang ginpahayag sang iya legal counsel nga indi mabaton ang amo nga pahayag kag indi dapat himuon nga topiko sang sekswal nga komentaryo ang bisan sin-o nga babayi.
