Nagpahayag ng matinding pagpuna si Paolo Duterte, kinatawan ng Davao City, at kinuwestiyon ang tunay na layunin ng mga nasa likod ng proseso ng impeachment laban sa kaniyang kapatid na si Sara Duterte.
Ito ay kasunod ng pagdedeklara ng House Committee on Justice na “sufficient in form and substance” ang ikatlo at ikaapat na impeachment complaints na inihain laban sa bise presidente.
Ayon kay Duterte, hindi na siya nagulat sa naging pasya ng komite. Gayunman, sinabi niyang tila ginagamit lamang ang impeachment bilang kasangkapan sa pulitika ng ilang puwersa, sa halip na magsilbing proseso para sa katarungan at patas na pagdinig.
Pinuri rin niya si Bong Suntay sa paninindigan nitong tutulan ang pag-usad ng mga reklamo, kahit umano’y may matinding presyur mula sa ibang mga mambabatas.
Nagbigay rin si Duterte ng babala sa 54 na kongresista na bumoto pabor sa impeachment. Aniya, pansamantala lamang ang kapangyarihan sa pulitika, ngunit ang pananagutan sa mamamayan ay pangmatagalan.
Bukod dito, iginiit din niya na may iba pang mahahalagang usapin na dapat pagtuunan ng pansin ng Kongreso at ng administrasyon. Kabilang dito ang imbestigasyon sa umano’y trillion-peso na katiwalian sa mga flood control projects, mga alegasyon ng pamamahagi ng pondo gamit ang mga maleta, at panawagan na sumailalim sa hair follicle drug test ang lahat ng miyembro ng Kongreso at Senado—pati na ang tinutukoy niyang “mastermind” ng impeachment at ang pamilya nito.
Sa huli, sinabi ni Duterte na darating ang panahon na ang taumbayan mismo ang maghahatol. At kapag dumating ang araw na iyon, dapat umanong maging handa ang lahat na ipagtanggol at panagutan ang kanilang mga naging desisyon at aksyon.
