Ginakabig sang P-pop group nga VRAJA nga oportunidad para sa pag-uswag ang mga kritisismo nga ila nabaton, sa baylo nga magpadala sa negatibo nga mga komento sang publiko.
Ini ang ginpahayag ni Aaron Porras ang King of Diamonds, Main Rapper kag Lead Dancer, sa interview sang Bombo Radyo Koronadal, kun sa diin iya ginpabutyag nga importante man nga pamatian kag tun-an ang mga kritisismo bangud mahimo ini nga giya sa pagpaayo sang ila performance.
Suno sa iya, kabahin na sang pagpanikasog sa industriya sang musika ang pag-atubang sa nagkalain-lain nga opinyon sang mga tumalan-aw.
Gani, kinahanglan nga may mabakod nga mentalidad kag abilidad nga kilalahon ang mga komento nga makabulig sa ila pag-uswag.
Apesar pa nagaatubang sang bashing, wala ginakalimtan sang grupo ang pagpasalamat sa ila mga supporters nga padayon nga nagahatag sang suporta kag nagapati sa ila kapasidad.
Sa karon, determinado ang VRAJA nga mas pauswagon pa ang ila talento paagi sa padayon nga paghanas kag pagtuon, agud mapamatud-an nga ang mga kritisismo mahimo mangin tikang sa mas maayo nga performance kag mas mabakod nga grupo sa P-pop industry.
