Nagpadayon ang mga pagpaalinton sang mga otoridad sa Jordan sa mga katawhan, ilabi na sa mga pumuluyo nga malapit sa US Embassy, nga maghalong sa posible nga pag-atake sang Iran.
Ini ang nangin pahayag ni Renalou Cabuyadao, Bombo International Correspondent to Jordan, sa interview sa Bombo Radyo Koronadal.
Suno kay Cabuyadao, ginbakwit na sang US Embassy ang tanan nila nga empleyado bangud sa mga pamahog sa ila seguridad bangud sa padayon nga mga tensyon sa Middle East.
Ginpahayag man ni Cabuyadao nga bisan wala pa nagatupa nga mga missiles sa Jordan, ginapunggan ini sang mga pwersa sang Jordan pinaagi sa interception.
Apang nagpabutyag siya sang kahadlok bangud sa posibilidad sang mga debris nga magalupok halin sa mga missile.
Sa pihak nga bahin, ginpasiguro ni Cabuyadao sa iya pamilya kag sa mga pamilya sang iban pa nga mga OFWs nga luwas ang Jordan sa direkta nga pag-atake.
Ginpahayag niya nga ang airspace sang pungsod lang ang gina-usar sang mga US-Israel kag Iran, kag wala sang direkta nga halit sa nasambit nga rehiyon.
