Una nga ginlatag sang lead defense counsel nga si Nicholas Kaufman ang mga argumento sang depensa may kaangtanan sa alegasyon sang pagpatay sa ginatawag nga high value targets (HVT) sang presidente pa sang Pilipinas si Rodrigo Duterte, sa katapusan nga adlaw sang confirmation of charges hearing sini nga Biyernes, Pebrero 27, 2026.
Sa mga submissions sang depensa nahanungod sa merit sang kaso, ginpahayag man ni Kaufman ang preliminary observations sang depensa may kaangtanan sa paglaragway sang Prosekusyon sa HVT bilang ebidensiya sang isa ka koordinado nga plano agud patyon ukon eliminahon ang target.
Suno sa iya, ang HVT isa lamang ka operational classification nga ginagamit sang law enforcement, kag wala ini sing kaibahan sa ginahimo sang iban nga pungsod pareho sang Australian Priority Organization targets.
