Isa ka sahi sang political persecution suno pa ang tikang nga ginahimo sa kasamtangan nga administration sa pagpasaka sang kaso nga cyber libel pinaagi sa National Bureau of Investigation (NBI) batok sa anay journalist nga Jay Sonza kag isa ka social media personality kag commentator nga si Jeffrey ”Ka Eric” Celiz.
Sa interview sang Bombo Radyo Koronadal kay Jeffrey ”Ka Eric” Celiz- Secretary General sang SAMBAYANAN ginpahayag sini nga wala sang basehan ang mga kaso nga bag-o nga ginpasaka sa ila sa diin suno sa iya isa ka sahi sang pagpamigos sa katungod sang mga Pilipino sang Freedom of Expression nga nakabatay sa konstitusyon.
Ginpahayag pa sini nga gina-weaponize sang gobyerno ang NBI agud nga pahiposon ang mga kritiko sang kasamtangan nga administrasyon.
Dugang pa sini,ginakabig niya ini nga kaangay sang madulom nga hitabo sa Martial law.
Nagpanindugan man ini nga wala sang sala sa iya nga mga pahayag bangud nagapamangkot lamang ini sang matoud-toud nga sitwasyon sang ikaayong lawas ni Pangulong Ferdinand Marcos Jr. bangud katungod man ini sang isa ka Pilipino nga mahibaluan kun may ikasarang pa ukon capacitated pa ini bilang isa ka mataas nga opisyal sang pungsod.
Negatibo naman ang konotasyon suno pa sa iya sang ini nga tikang sa mga iban pa nga miyembro sang media bangud mahimo man suno pa nga mapasakaan sang kaso ang sin-o man nga mga nagapamangkot sang ikaayong lawas sang Presidente.
Gina-alegar nga pagpalapta sang peke nga medical information ni President Ferdinand Marcos Jr. ang kabangdanan sang kaso nga ginpasaka sa iya kag iba pa nga mga social media personalities.
