Yara na sa kustodiya sang mga awtoridad ang apat ka suspek matapos maaresto sa ginpatigayon nga anti-smuggling operation sa Barangay Labu-Labu 1, Datu Hoffer, Maguindanao del Sur sang Biyernes, Disyembre 6, 2025.
Ginkilala ang mga suspek nga sanday Mohamad Guintawan, 24-anyos; Rahim Unos, 24-anyos; Aberentos Unos, 30-anyos; kag isa pa nila ka kaupud nga menor de edad.
Suno kay Brig. Gen. Jaysen De Guzman, direktor sang Police Regional Office–Bangsamoro Autonomous Region, napunggan ang pag-deliver sang apat ka lalaki sang smuggled nga sigarilyo nga nagabalor P4.1 milyon sa mga negosyante sa pila ka lugar sa Datu Hoffer, tungod sang madasig nga pag-report sang mga residente nga nakakita sa ila nga nagadiskarga sang kontrabando sa Barangay Labu-Labu 1.
Nakumpiskar sang mga awtoridad halin sa mga suspek ang 103 ka mga kahon nga may unod nga mga ilegal nga sigarilyo.
Sa subong ang mga nakumpiskar nga mga sigarilyo yara na sa kustodiya sang Bureau of Customs para sa nagakaigo nga disposisyon.
