Padayon ang pagtutok sang Armed Forces of the Philippines (AFP) sa pagpabilin sang kalinong sa Bangsamoro Autonomous Region in Muslim Mindanao (BARMM), Special Geographic Areas, kag Region 12.
Ini ang ginpahayag ni Lt. Col. Ronald Suscano, tagpamaba sang 6th Infantry Division, Philippine Army, sa interbyu sang Bombo Radyo Koronadal.
Suno kay Suscano, isa sa mga pamatuod sang padayon nga kampanya para sa kalinong ang pagpresentar sang 38th Infantry Battalion (38IB) sa Provincial Capitol sang Koronadal City sang 16 nga nagbalik-loob sa gobyerno — 9 nga anay rebelde kag 7 nga anay violent extremist.
Ginturn-over man sang mga ini ang ila mga armas kalakip ang M1 Garand rifles, M2 carbines, M653 rifles, improvised M16 rifles, homemade M79 grenade launchers, kag 7.62mm rifles.
Sa karon, ang mga Former Rebels (FRs) kag Former Violent Extremists (FVEs) ang kasalukuyang ginaberepika sang Joint AFP–PNP Intelligence Committee kag ipaidalom sa De-radicalization kag Reintegration Program sa idalom sang Enhanced Comprehensive Local Integration Program (E-CLIP).
Samtang, dose (12) ka matataas nga kalibre sang armas naman ang ginsuko sa Poblacion, Talitay, Maguindanao del Norte, paagi sa pagbinuligay sang LGU Talitay, 1st Mechanized Battalion, kag 601st Infantry (Unifier) Brigade sang 6th Infantry (Kampilan) Division.
Dugang pa ni Lt. Col. Suscano, ang mga nasambit nga pag surender ang maathag nga indikasyon sang kadalag-an sang kampanya sang gobyerno para sa kalinong, upod ang mga lokal nga panguluhan kag mga residente sa mga komunidad.
