Mainit kag malipayon ang nabatyagan sa duha coach sang delegasyon sang Tuguegarao City sa ila pag-abot sa General Santos City para sa Batang Pinoy 2025.
Sa interview sang Bombo Radyo Koronadal kay nanday Coach Angie Dayag kag Assistant Coach Kyslev Ernest de Guzman sang Taekwondo Team – Tuguegarao City. Suno kay Assistant Coach de Guzman, ini ang una nga tion nga magapartisipar sila sa Batang Pinoy, kag nalipay sila nga makita ang madamo nga mga atleta halin sa nagkalain-lain nga syudad kag probinsya sa bug-os nga pungsod.
Dugang pa niya, masobra duha ka bulan man nga nagpreparar kag nag-ensayo ang ila mga atleta agud mangin preparado sa nasambit nga torneo.
Samtang, ginpahayag man ni Coach Dayag nga may daku sila nga pagsalig sa ila mga taekwondo players nga mangin madinalag-on sa kompetisyon, bangud sa ila maid-id nga preparasyon kag dedikasyon sa isports.Naghatag man sang mensahe ang mga coach sa tanan nga atleta nga magpadayon sa pag-ampo, mag-enjoy sa hampang, kag ipakita ang espiritu sang pagka-sportsman agud mangin malampuson ang Batang Pinoy 2025.
